પાટણ: ચાણસ્મા નજીક અજાણ્યા વાહનની ટક્કરથી માનસિક અસ્વસ્થ યુવકનું મોત, તપાસ શરૂ
ચાણસ્મા તાલુકાના કંબોઈ ગામનો 38 વર્ષીય માનસિક અસ્વસ્થ યુવક જીતેન્દ્રસિંહ સોલંકી પોતાના મામાના ઘરે જાખાના ગામ જવા માટે કોઈને જાણ કર્યા વિના ઘરેથી નીકળી ગયો હતો. મુસાફરી દરમિયાન, જીતોડા અને જાખાના ગામ વચ્ચેના રસ્તા પર અજાણ્યા વાહનચાલકે તેને ટક્કર મારી હતી, જેને કારણે યુવકનું ઘટનાસ્થળે જ કરુણ મોત નિપજ્યું હતું.
આ દુઃખદ ઘટના બાદ અજાણ્યો વાહનચાલક સ્થળ પરથી ફરાર થઈ ગયો હતો. મૃતકના પિતા દ્વારા ચાણસ્મા પોલીસ સ્ટેશનમાં ફરિયાદ નોંધાવવામાં આવી છે. મળતી માહિતી મુજબ, મૃતકનું પોસ્ટમોર્ટમ ચાણસ્મા રેફરલ હોસ્પિટલ ખાતે કરવામાં આવ્યું છે.
હાલમાં ચાણસ્મા પોલીસ સ્ટેશનના પીએસઆઈ બી.એસ. ચૌધરીના માર્ગદર્શન હેઠળ વધુ તપાસ ચાલી રહી છે. પોલીસે અજાણ્યા વાહનચાલક સામે ગુનો નોંધ્યો છે અને સી.સી.ટી.વી. ફૂટેજ સહિતના સાધનોની મદદથી તપાસ આગળ ધપાવી છે.
આ ઘટના સ્થાનિકોમાં શોકની લાગણી ફેલાવી રહી છે અને રોડ સુરક્ષા અંગે ફરી પ્રશ્નચિહ્ન ઊભા કરી રહી છે.